هناء الصغير
هاجمت الإعلامية أميرة بدر وبعض الاصوات الإعلامية المسموعة تصريحات الفنانة إلهام شاهين، عن إيقاف أحد المخرجين تصوير مشهد لأداء الصلاة.
وقالت أميرة بدر، خلال برنامجها «خلاصة الكلام» عبر قناة النهار: «فيديو الفنانة الكبيرة إلهام شاهين قديم لكنه يستحق عمل حالة من الجدل، إحنا بنحب وبنحترم إلهام شاهين، وبنحب نحافظ على قوتنا الناعمة، لكن هل التدين أصبح حالة غريبة؟ وهل فرض ربنا أصبح تدين».
وأضافت: «إيه المشكلة لما المخرج ياخد العمال ويصلي بيهم ربع ساعة؟!.. في فنانات ممكن المخرج وكل العمال والاستوديو ينتظروهم ساعتين وثلاثة لغاية ما تخلص شعرها أو المكياج أو لو حضرت متأخرة، في كلام مقبول وكلام غير مقبول».
وتابعت: «طبيعي جدا حتى أثناء التصوير إنه يصلي فرض ربنا، التصوير واللوكيشن والدراما والمسلسل والسينما والفيلم مش أهم من فرض ربنا، والكلام كان مستفز لمشاعر مسلمين كتير جدا».وقالت إلهام شاهين في تصريحاتها عن الأمر: «حملة واضحة ضدي، وواضح إنى تاعباهم ومشغولين بيا وبآرائى جدًا، واسمى بيبيع بالنسبة لهم وآرائى تخصني لا أفرضها على أحد».
وتابعت عن رد فعلها على رسائل السوشيال ميديا: «أنا مش شاغلة بالي خالص بالسوشيال ميديا والناس اللي بتتسلى، ده عالم وهمي بالنسبة لي، وعارفة إن ليا أعداء وعارفة الأسباب، وفي النهاية الكلاب تنبح والقافلة تسير».
وأكملت: «كده كده حتى لو مليش رأى سيختلقوا كلام ويدعوا إنى قلته عشان يهاجموني، ناس تافهة وعايزة تتسلى».
واختتمت إلهام شاهين: «ممكن تكون ناس حاقدة وكارهة لأن شخصيتي تاعباهم أو كايداهم أو مجنناهم، كل يوم قصص وحواديت على إلهام شاهين، لا تهمني ولا تشغلني، وأقول لهؤلاء المرضى موتوا بغيظكم».
