عبدالله عادل عبدالله
الثابت والمؤكد عن طريق الاحاديث الصحيحة، ان ليلة القدر في العشر الاواخر من رمضان، وبتكون ليلة فردية، يعني ٢١ أو ٢٣ أو ٢٥ أو ٢٧ أو ٢٩ وفي احاديث صحيحة بتأكد انها ممكن تيجي في اخر ليلة من رمضان يوم ٣٠
طيب هو ايه فضل ليلة القدر؟ ليلة القدر الليلة اللي نزلت فيها اول سورة من القران على سيدنا محمد عليه الصلاة والسلام واللي قال عنها ربنا في كتابه العزيز “ليلة القدر خير من ألف شهر” وقال عنها النبي “من قام ليلة القدر إيمانًا واحتسابًا غفر له ما تقدم من ذنبه”
تخيل معايا ليلة واحدة هتعمل فيها حاجات معينة هيتغفر ليك أي ذنوب عملتها من يوم ميلادك وعملك في الليلة دي هيساوي عند ربنا عبادة وطاعات ١٠٠٠ شهر ومش بعيد يوم القيامة تلاقي الليلة دي سبب ان ميزان حسناتك يطب وتدخل الجنة !!
انت متخيل يعني ايه الف شهر؟! يعني أكتر من ٨٣ سنة !!
طيب ايه المطلوب منك في العشر ايام وليالي دول واللي اكيد باذن الله ليلة القدر هتكون واحدة فيهم عشان يحسب لك انك قمت ليلة القدر ؟
رقم واحد :
وقد يبدو شئ بديهي الا وهو الصيام، مش بس انك تصوم عن الاكل والشرب لكن كمان انك تصوم عن الذنوب وعن الكبائر وعن أي فعل ممكن يغضب ربنا
رقم اتنين :
الرسول عليه الصلاة والسلام قال لنا ان صلاة العشاء جماعة تعادل قيام نصف الليل، وصلاة الفجر جماعة تعادل قيام الليل نص الليل، يعني العشاء والفجر جماعة يعادلوا قيام الليل كله
بالتالي مطلوب منك طول العشر أيام الحفاظ علي كل الصلوات جماعة ودي من غيرها اعتبر نفسك فاتك فضل ليلة القدر.
رقم تلاتة :
بالنسبة للتراويح في حديث عن الرسول عليه الصلاة والسلام “من صلى مع الإمام حتى ينصرف كتب له قيام ليلة” فحاول طول العشر ايام تلتزم بصلاة التراويح ورا الامام في المسجد
رقم أربعة :
طيب هنفترض ان ظروف شغلك متسمحش ليك انك تصلي التراويح ساعتها تقدر تقيم الليل في بيتك ومستحب ان صلاتك تكون في الثلث الأخير من الليل، يعني من بعد الساعة ١ بليل
وصلاة قيام الليل الرسول كان في اغلب الوقت بيصليها ١١ ركعة، ركعتين ويسلم ويبدأ ركعتين جداد خمس مرات = ١٠ ركعات وفي النهاية بيصلي ركعة واحد ( الوتر ) عشان يبقوا ١١ ركعة كاملين بنية قيام الليل
ممكن حد يسأل هل ممكن حد يصلي التراويح ويصلي قيام الليل في الثلث الاخير من الليل في بيته؟ لو حد عنده المقدرة انه يعمل ده فأكيد أفضل واحسن ليه واجر أكبر وأهم حاجة الصلاة تكون بخشوع وهدوء ومفهاش سربعة ولا استعجال
رقم خمسة :
من احب الاعمال عند ربنا بعد الصلاة المفروضة بر الوالدين، لو والدك او والدتك او حد منهم عايش حاول تستغل الفترة دي بانك تبره وتراضيه وتعمل الحاجات اللي يحبها منك ولو متوفين او حد منهم متوفي تصدق عنه وادعيله في كل صلاة
رقم ستة :
كتر من الدعاء في العشر ايام دول على قد ما تقدر خصوصا في السجود، وأكتر دعاء حاول انك تردده دايما الدعاء اللي الرسول عليه الصلاة والسلام قال اننا ندعي بيه في ليلة القدر وهو “اللّهم إنك عفو تحب العفو فاعف عني”
وادعى بكل حاجة قلبك يتمناها ومتنساش اخواتنا من دعاءك
رقم سبعة :
حاول تكتر خلال الايام دي من قراية وتدبر القران والاستماع ليه بصوت المشايخ اللي بترتاح لسماع القران بصوتهم
رقم تمانية :
حاول طول الوقت ذكر ربنا يبقى على لسانك وهسيب لكم في الكومنتات أكتر الاذكار المستحبة
رقم تسعة :
الرسول عليه الصلاة والسلام كان بيضاعف الصدقات في رمضان فحاول على قد ما تقدر تزود الصدقات خلال العشر ايام دول
..
أكيد ابواب الخير وابواب الطاعات مش مقتصرة على الحاجات دي بس وأي حاجة هتزودها أجرك هيزيد عند ربنا بس أهم حاجة تحاول على قد ما تقدر تلتزم بالحاجات دي على الاقل وباذن الله رمضان ميخلصش غير واحنا من اللي ربنا يعتقهم من النار ويعفو عنهم ليلة القدر
