في لحظة معينة تلاقي نفسك راجع لجواك من جديد بعد فترة طويلة كنت فيها بعيد عن روحك مشغول بكل حاجة إلا نفسك متوه وسط زحمة الأيام ومشاهد الحياة اللي بتسحبك من حتة لحتة لحد ما تنسى صورتك الأصلية اللي بدأت بيها المشوار وتفضل ماشي على سرعة عالية من غير ما تسأل هو أنا رايح فين ولا ليه .
ومع أول وقفة صادقة تلاقي إن داخلك بينادي عليك اللي عشته كتير واللي تحملته أكتر واللي كتمته من غير ما تشتكي كل ده بيظهر قدامك مرة واحدة كأنك بتشوفه لأول مرة رغم إنه كان جواك طول الوقت ويمكن ده أصعب شعور إنك تكون غريب عن نفسك أكتر من غربتك عن الناس وتبدأ ترجع بالتدريج ترجع لحاجات كنت بتحبها واختفت ترجع لأفكار كنت بتهرب منها ترجع لراحة كنت فاكر إنها مش موجودة ترجع لإحساسك الحقيقي اللي.
ضاع وسط مسئوليات وأدوار أكبر من طاقتك ترجع لفطرتك الأولى قبل ما الدنيا تزوق الحقيقة أو تعقدها وترجع تفهم إن اللي كنت بتسميه صلابة كان ساعات مجرد هروب وإن اللي كنت شايفه قوة كان استهلاك أعصاب وإن اللي كنت فاكر إنه حب كان تعلق وإن أغلب المعارك اللي خضتها ما كانتش تستاهل نقطة دم من قلبك.
وتبدأ تتبدل نظرتك لنفسك تبدأ تشوف قيمتك بصدق وتعرف إنك ما كنتش محتاج رأي حد علشان تكون كفاية وإنك ما كنتش ناقص حاجة غير إنك تحط نفسك الأول ولو لمرة واحدة وإن التضحية اللي كانت تبان بطولة ممكن تكون في الحقيقة خنق لروحك.
وترجع تتصالح مع أخطائك وتفهم إن اللي فات ما يهدمش اللي جاي وإنك اتعلمت بالطريقة الأصعب بس الأصدق وإنك مهما ضعت تقدر تلاقي طريقك تاني لأن الطريق الحقيقي بيبدأ من جوه مش
من الدنيا برا تكتشف إن الرجوع لنفسك أعظم رحلة ممكن تمر بيها رحلة ما تحتاجش سفر ولا صدفة ولا معجزة تحتاج بس لحظة صدق ولحظة شجاعة ولحظة سكون تقول فيها لنفسك رجعت
