الليلة ريحتها غير أي ليلة فاتت
تكبير وسكينة ورحمة للقلوب اللي تعبت
والناس بين داعي وبين عين دمعت
تطلب رضا الرحمن عن سنين عدت
في ليلة عرفات تتهد جبال ذنوب
ويفتح رب كريم لعباده ألف باب وتوب
يا بخت قلب صافي ما شالش يوم عيوب
ولا كسر خاطر غلبان موجوع ومغلوب
العيد مش فرحة لبس ولا صوت الأغاني
العيد إنك تدخل سرور على قلب بيعاني
وتكون رحمة لروح تعبت من الأماني
وتقول كلمة خير تطيب خاطر إنساني
يمكن دعوة من أم مكسورة ترفعك
أو دمعة فقير ربنا بسببها يكرمك
أو جبر خاطر يتفتح بيه رزقك
اصل الكريم عند رب العالمين مقامه يسبقك
في ليلة كلها نور سامح اللي زعلك
وشيل من قلبك هموم ووجع كان تعباك
الدنيا مهما تطول يوم هتودعك
ويبقى بس الخير اللي الناس فاكراك بيه بعدك
يا رب في الأيام المفترجة المباركة
ارزق كل بيت ضحكة وفرحة متباركة
وابعد عننا الغدر والنفوس المتحجرة
وخلي المحبة بينا دايمًا متصدرة
وكل سنة وإحنا على الود متجمعين
لا كسر قلب ولا بينا خصام سنين
وتفضل مصر بأهلها في خير وأمان دايمين
ويحفظ ربنا كل حبايبنا الغاليين
كلمات وتأليف شاعرالبسطاء سعيدسعيدامام
