أعز الوِلد وِلد الوِلد
والكلام دا طلع بجد
كنت فاكره زمان كلام
قول مجاملة والسلام
رغى فاضي ملوهش عازه
يعني شىء كدا في اللذاذة
لكن لما صَبحت أنا جد
وربي بارك عُمري مد
من السبعين قربت شوية
وهبني المولى أغلى هدية
ولأولادي أنا شوفت ولاد
وف حُضني ضميت أحفاد
كانوا لشيبتي ربيعها ونسمة
وكلامهم كان أجمل همسة
فرحة لقلبي وعادت تاني
وسعادة لروحي ووجداني
لسنين عمري كانوا الورد
مليون شُكر ياربي وحمد
فى ختام قولي والأمنية
ربي يبارك في الذرية
ويحفظهم من أى شرور
يبقا طريقهم خير وسرور
