بحلم مش بالحلم اللي نعيشه قبل النوم لكن بالحلم اللي يفضل صاحي جوانا بيصحينا كل يوم على أمل جديد بيدينا سبب نكمل.
بحلم ببلد فيها كل واحد فينا يحس إن له مكان وإن له قيمة وإن التعب عمره ما بيروح هدر.
بحلم إن الحق ما يتوهش وإن الكلمة الحلوة تبقى هي الأساس بين الناس.
بحلم بمصر اللي فيها الشغل متاح والتعليم طريق مفتوح والمستشفى بابها دائما ما يتقفلش في وش حد.
بحلم إن الغالي يرخص لما ننتج بإيدينا وإن الشباب يلاقي فرصة يثبت نفسه بدل ما يسافر ويدور على نفسه بره.
بحلم إن الكبير يعيش مطمئن والطفل يضحك من قلبه والست تمشي في أمان متخافش من مخاطر الطريق ولا تتكثف.
بحلم إن الشارع يبقى نضيف وتلاقي الكلمة طيبة والضحكة راجعة من تاني على وشوش الناس.
بحلم بمصر اللي تبني مش بس حجر تبني إنسان وضمير، وأمل
بحلم إن اللي يزرع يشوف زرعه واللي يخلص يلاقي تقدير.
بحلم إننا نحب بعض بجد ونسمع بعض ونقف جنب بعض لما الدنيا تضيق.
بحلم إن كل واحد فينا يبدأ بنفسه يصلح، و يسمح، ويحاول لأن البلد مش تتغير غير بينا وإحنا بس اللي نقدر نحول الحلم الى حقيقة.
بحلم بحياة يكون فيها العدل مش شعار، بل سلوك يومي،
بحلم ببلد فيها الاختلاف مش تهمة بل قوة تخلينا نكمل بعض بدل ما نتصارع.
بحلم بوطن يسمع أكتر ما يتكلم يشوف مواطنيه بعين المساواة لا فرق بين غني وفقير ولا بين صوت مسموع وآخر مكتوم.
بحلم إن اللي يتعب ياخد حقه وإن اللي عنده فكرة تخدم وطنه يلاقي فرصة مش بيروقراطية تكسر جناحه.
بحلم إن الطفل يتعلم يحلم مش يخاف من بكره. بحلم إن الست تمشي مرفوعة الرأس مش خايفه من نظرة أو حكم بحلم إن الكبير يعيش بكرامة مش يقلق على لقمة عيش أو دواء.
بحلم بمصر اللي فيها النيل مش مجرد مجرى مائي لكنه شريان حياة في كل ضمير،
بحلم ان اشوف مصر شوارعها أنظف و قلوب ناسها أحن عقول شبابها أوسع.
بحلم بمصر اللي العالم كله يحلم يزورها مش عشان منبهرا بآثارها بس لكن بروحها، بأخلاق أهلها بابتسامتها اللي رغم الوجع عمرها ما غابت عن اهلها.
بحلم إن كل واحد فينا يبدأ بنفسه، لأن التغيير مش قرار من فوق لكنه شعلة من جوا. كل واحد فينا لما يصدق إن له دور، وإنه قادر يضيف،
وقتها الحلم هيبقى واقع.
مش لازم نكون مثليين لكن لازم نكون صادقين مع نفسنا، مع بلدنا ومع حلمنا.
أنا بحلم ومش لوحدي، لأن اللي بيحب مصر عمره ما يقدر يوقف الحلم.
فطالما في نفس بيتسحب في صدر الوطن، وطالما في قلب يحبها هيفضل الحلم ممكن… ومصر دائما قد الحلم.
