إعداد وتقديم مرفت عبد القادر
مطبخ الصوت
المقادير :
2 كيلو فراولة
4 كوب سكر
نص معلقة صغيرة ملح ليمون .
طريقة التحضير :
غسلت الفراولة كويس اوووي مرة واتنين وتلاتة لما تبقي نظيفة خالص وبعد كده أشيل العنقود الاخضر منها واقطعها حتت صغيرة وهاضيف عليها السكر واقلبها كويس مع السكر واغطيها وأشيلها في التلاجة لمدة ليلة كاملة ..
بعد كده هاحط الفراولة في حلة وارفعها علي النار الاول علي درجة حرارة عالية واول ما تغلي معانا الفراولة اوطي عليها النار واخليها علي درجة حرارة هادية وبالمعلقة أشيل اي ريم ابيض بيظهر علي الوش وهتفضلي تشيلي الريم ده لما يبقي مفيش اي ريم خالص وده خطوة مهمة جدا
علشان الريم ممكن يغير معاكي طعم الفراولة لو مش شلته .
هتلاحظي بعد كده أن الفروالة حجمها يقل شوية وقصرت معانا والريم بيقل خالص يعني بعد حوالي نص ساعة علي نار هادية هتلاقي الفروالة قوامها بقي سميك وتقلت معاكي شوية وفي المرحلة ده هاضيف عليها ملح الليمون .
طيب تعرفي ازاي أن الفروالة استوت وبقت مربي وتطفي عليها هتجيبي طبق وتحطي فيه معلقة كبيرة من مربي الفروالة وتسيبها تبرد شوية وتعملي فيها خط بأيديكي لو الخط ده رجع بسرعة يبقي هي كده لسه محتاجة شوية علي النار لكن لو الخط فصل ومرجعيش معاكي يبقي هي كده استوت وتطفي عليها لو انتي حابة ان الفروالة تكون معاكي فيها قطع .
طيب لو حابة ان الفروالة تكون معاكي المربي كريمي من غير قطع هتسيبها علي النار وبالهنبلندر هتضربيها لما تنعم معاكي خالص وتبقي كريمي أطفئ عليها .
وبعد كده اجيب البرطمانات اللي هاحط فيها المربي واعقمها كويس اووي ويبقي مش فيها ولا نقطة مياه لأن لو البرطمان لو فيه مياه هيبوظ المربي وبعد كده احط الفروالة في البر طمانات بعد ما بردت واشيلها في التلاجة .
ملحوظة :
علشان المربي تعيش معاكي ومتحمضيش منك المعلقة اللي بتاخدي بيه لازم تكون نظيفة ومش فيها أي مياه خالص
وممكن تعملي ايه نوع فاكهة بنفس الطريقة وبالف هنا .
