طريقة عمل الجاتوه فى البيت بكل سهولة
إعداد وتقديم// مرفت عبد القادر
مطبخ الصوت
الجاتوه : 🍰🍰
المقادير:
كوب ونص دقيق
٤ بيضات
كوب الاربع لبن
نص كوب زيت
كوب الاربع سكر
1 م ك خل ابيض
2 م ك كريم شانتيه
2 م ك لبن بودر
فانيليا ورشة ملح
كيس بيكنج بودر
مقاس الصينية 30 في 40
الطريقة :🍰🍰
في الخلاط نضرب البيض والفانيليا واللبن
والزيت والكريم شانتيه والخل واللبن البودر والسكر .
وننزل بالخليط ده على الدقيق المنخول
بالبيكنج بودر ورشة الملح ونخلطهم
في اتجاه واحد بمضرب السلك
صينية وعليها ورقة زبدة مدهونة زيت
وننزل بالخليط في الصينية
ويدخل فرن سخن على درجة حرارة 180
هياخد 15 دقيقة
ورقة زبدة ونحطها على وش الكيك ونقلبه
على الرخامة هنشيل الورقة اللي من تحت
وبعدين هنقسم الكيك لنصين متساويين
وهنحط كريم شانتيه في نص ونقفل عليه بالنص التاني.
وعلى الوش باقي كريم شانتيه وهتساويه
بسكينة براحة عشان يبقي حلو واي زيادات
تطلع في السكينة بنمسحها بمنديل ونفضل
نعمل كده لحد مالسطح يتساوي وبعدين
هنجيب شوكه ونعمل خطوط عليه عشان
يديكي شكل حلو من الوش
وبعدين تقطعيه قطع متساوية يعني كل
قطعه 4 سم هيطلعو 6 فطع جاتو
وبعدين تزينيه بقا بالشكل اللي تحبيه
اي فاكهة تحبيها او
شوكلاته مبشورة ونقدم
مقادير الكريم شانتيه :🍰🍰
كوب كريم شانتيه خام
كوب ماء متلج
2 م ك سكر بودر
ونضربهم بمضرب الكهربا لحد مايدينا قوام متماسك.
