النضج الحقيقي لا يعني التحمّل الدائم، بل القدرة على التمييز: ما الذي أستطيع احتماله؟ وما الذي يجرحني؟ الاعتراف بالحدود ليس أنانية، بل احترام متأخر للذات التي لم يُسمح لها يومًا أن تقول: هذا يؤلمني.»
تعالوا نعرف اكتر عن معني النضج:
كتير مننا اتربّى على فكرة إن النضج يعني “استحمل وخلاص”، وإن الشخص العاقل هو اللي يعدّي ويكتم وما يشتكيش. مع الوقت، اتحوّل التحمّل لواجب، والوجع لحاجة لازم تتخبّى علشان ما نبانش ضعاف.
لكن الحقيقة إن النضج مش إنك تستحمل على طول… النضج إنك تبقى فاهم نفسك. عارف إمتى تقدر تتحمّل، وإمتى التحمّل ده هيبقي استنزاف لروحك. إنك تميّز بين موقف صعب وهيمر، وبين وجع متكرر بيستهلكك كتير من الناس ما تعرفش تقول “ده بيأذيني”؛ مش لأنهم أقوياء، لكن لأنهم ما اتسمحلهمش قبل كده يعترفوا بوجعهم.
اتعلموا بدري إن الحدود قلة تقدير، وإن الاعتراض أنانية، وإن السكوت فضيلة. علشان كده، لما حد يبدأ يحط حدود، غالبًا بيحس بالذنب. يحس إنه قاسي أو مقصّر. مع إن اللي بيعمله في الحقيقة هو احترام متأخر لنفسه… لنفس كانت دايمًا مطالبة تتحمّل أكتر مما تحتمل.
الحدود مش انسحاب، ومش قلة حب. الحدود هي إنك تقول: أنا موجود، وبحاول، بس مش على حساب نفسي. وإن وجعي له قيمة، وصوتي يستحق يتسمع. وده هو النضج الحقيقي: إنك ما تسيبش نفسك تتأذى بإسم الصبر او الطيبة.
