جاني ابويا في المنام…
اتفرد جنبي ونام
قالي فينك يابن ضهري
حتي مستخسر زيارة؟؟؟
قلتله في الدنيا يابا
قالي دنيتكم خسارة
قلتله مطحون يابويا في الرحايا
بجري جري الوحش فيها
من صباحي ولمسايه
قاللي يابني عيش حياتك…
ارضِ ربك وارضِ ذاتك
قاللي اسألني أنا
مش هينفعك إلا عملك
اعمل الصالح تملي
زيي يابني
صوم وصلي
خلي حسناتك تعلي
خلي ذكر الله تملي فوق لسانك
ادعي يابني في كل لحظة
مش عشاني …..لأ عشانك
ده الدعا هيعلي شأنك
ما تلمس إيدك حرام
ولا يدخل جيبك حرام
بالحرام يابني بتضيق القبور
قلتله ويش حالك بقبرك؟
قاللي يابني كله نور
قد إيه ربك رحيم
قد إيه ربك غفور
كنت رايح له وشايل
فوق كتافي الف ذنب
بس كان جوايا قلب
ماعرفش إلا يحب
ربنا رحمته اوسع
مما يتصور خيالك
ابتسمت في ضي وشه
وقولتله دي مكتوبالك
زدني يابا في النصيحة
قاللي هاقولها لك صريحة
اوعي يابني في مرة
تظلم
أو تكون أداة لظالم
وانصف المظلوم تملي
خلي قلبك بيت مظالم
خلي يابني البال من امك
زيها مايشلش همك
في رضاها السعد يابني
مهما تعلي ولا تبني
خلي بالك من ولادك
هما دول مالك و زادك
هما دولة امتدادك
قلتله نفسي اجيلك
قالي كل شئ يابني بأوان
كل واحد له أوانه
بالمكان وبالزمان
قمت بايسه فوق جبينه
ولمست بشوق عيونه
وصحيت م النوم بفرحة
شفت ابويا في المنام
من حلاوة الحلم نفسي
كل مااقوم تاني ….انام ؟؟؟؟
