خدعوك فقالوا: “نصوم رمضان لكي نشعر بالفقراء”
ابني عايز يشرب لأنه مش شايف إن فيه حكمة من العطش …!!!
لو بنصوم ع شان نحس بالفقراء … فكفاية إننا ما ناكلش ، ليه ما نشربش ….؟؟
وبعدين الفقراء كمان بيصوموا… طب بيصوموا ع شان يحسوا بمين …؟؟؟
الحقيقة الواد عنده حق ..
فكرة إن الصيام هدفه إننا نحس بالفقراء فكرة غلط ١٠٠٪ ..ما فيش آية في القرآن بتقول إننا بنصوم ع شان نحس بالفقراء …
الفكرة دي بتطلع ملايين فاهمين إن الصيام مجرد تكدير وعكننة .
شوية جوع وعطش، وصداع، كان ممكن نحس بالفقراء بطريقة تانية غير كدا .
ودي كارثة .. لأننا بنخسر الهدف الوحيد من الصيام ،ولما الهدف يضيع منك هتتعب أكتر لإنك مش فاهم حكمته .
علم ولادك إن الصيام مفروض علينا علشان نتعلم نتحكم في شهواتنا .
علم ولادك إن الصيام مفروض علشان ندرب نفسنا ع الصعب .
علم ولادك إن فكرة الصوم هو تأديب وتهذيب الجسد لكبح رغباته وإقماع شهواته، فليس كل مايطلبه يناله.
علم ولادك إن الصيام بيمنعنا من شهوات حلال علشان بعد كدا ترك الغلط والمعاصي والحرام يبقي سهل .
علم ولادك إن الصيام اللي بيمنعك من الحلال وانت بتقوله سمعًا وطاعة هو دا قمة الخضوع والاستسلام لله
علم ولادك إن التسليم المطلق لله من غير ليه وازاي هو ده اللي احنا اتخلقنا علشانه.
علمه من دلوقتي علشان الموضوع هيبقى أصعب بكتير لو كبر من غير ما يتعلم .
وكل عام وأنتم بخير
وعلى المحبة نلتقي،،
رئيس مجلسي الادارة والتحرير
عادل سعد عبيد
