النجاح فى الرياضة عبارة عن مثلث متساوى الاضلاع و تتكون اضلاعه من المدرب _ ولى الأمر _ اللاعب ولا نستطيع الاستغناء عن اى ضلع من هذه الاضلاع أو نقلل من اهميته
و من هذه الأضلاع ضلع هام جدا و هو ولى الأمر لأن دور ولى الأمر مهم جداً فى استكمال دور المدرب لما يقع على عاتق ولى الأمر من مسؤليات عظيمة
و يجب ان نعلم جميعآ ان الرياضة من سن خمس سنوات او اقل حتى سن عشر سنوات مرح ولعب فلا تضغط على ابنك او بنتك عشان طفل فاز بميداليه والا طفلة سبقت ابنتك
و سنجد ولى امر ينهار لأن الولد الذى كان ابنه يفوز عليه العام الماضى اصبح الأن يفوز على ابنه … ايوا يا فندم لأن فى مرحلة اسمها مرحلة البلوغ وابن حضرتك لم يبلغ بعد بينما اللاعب الأخر الذى ارتفع مستواه بلغ وجسمه اصبح اكبر واقوى و إطمئن لان ابنك عندما يبلغ سيفرحك و لكن لا تضغط عليه و دعم فيه الثقه بالنفس
و الناس التى تتدرب تدريب خاص تدفع فلوس للتدريب والفتنس والتغذية والانسان عندما يدفع يلتزم فهم نجحوا لأنهم التزموا و جرب حضرتك تلتزم و سوف ترى نجاح ابنك او بنتك
حتى لا نعلق اخطأنا على شماعة غيرنا
و فى اى نادى وفى كل مرحلة سنيه ستجد ولى أمر او اتنين يلعبون دور القائد و سيفهموك انهم يريدون المصلحه العامة للفرقة و النادى و الدولة و الكرة الأرضية ويستفزوك من اجل عمل مشاكل مع الكابتن او المساعدين او المسؤليين والا ستصبح فى نظرهم ضعيف او ليس لديك ضمير
هؤلاء لا يهمهم مصلحة عامة ولا غيرها و لكن يعملون على هذه النغمة من اجا اكتساب الناس الطيبة و كل همهم ان يعرفوا المدربين ان صوتهم جامد ومسموع عند الناس و يتخاف منهم فيهتموا بأولادهم وينسوا الباقى
اياك ان تصبح من القطيع الذى يساعدهم من اجل ابنك او ابنتك فانتم من تجعلوا منه قائد وانتم من سيتم اهمال أولادكم فى الاخر من اجلهم
لما ابنك او ابنتك لا ينجح فى بطولة فلا يجب ان نزيد المواجع كلها وانه كان مهمل و لديه لامبالاه والكلام الكتير الذى يألم … بذلك الاسلوب سنجعله يكره الرياضة ويكرهكم انتم ايضأ فهو محتاج كلام فى هذه الفتره يخرجه مما هو فيه مثل اننا مازلنت فى اول المشوار ولسه هنكسب وهنخسر وبعد ذلك نعرف انتوا اوجه التقصير و نعالجها بهدوء
و اولياء الامور عند الاجتماع مع بعضها يتكلمون على المدرب و ستجد ناس يستفزونك ان المدرب مش كويس و لا يوجد اى جديد مع الفريق والناس دول اصلا ستجدهم غير ملتزمين و لكن مبدأهم ( يانعيش عيشه فل يا نموت احنا الكل) بمعنى مش ملتزم ومش عايز حد يبقا كويس ولو احضرنا مدرب من السما سيكون فيه عيوب لاتعد
ركز مع ابنك او ابنتك و اترك اى كلام حولك لأنك ستجد من يقول ان ابنك ضعيف فى الماتشات وبيخاف و كلام من هذا القبيل ابتعد لأن احدهم يريد ايقاعك مع أخر وانت تفقد تركيزك مع اولادك و تجد نفسك فى حته تانيه خالص و فى الاخر ستكون انت غلطان
و الرياضة ليست لعب وضرب و منافسة فقط و لكنز الرياضة اخلاق فحاول تعليم اولادك الالتزام بمواعيد التدريب و زى التدريب فلا يصح ان يأتى ابنك يتدرب بزة الدرس
علمه المسئولية و ليس الجو برد اليوم فلا داعى للتدريب لأنه مرة مع مرة سيعتاد على عدم تحمل المسئولية وعدم الالتزام
و اهتم جيدآ بتغذيه مستقبلك فابنك او ابنتك هم مستقبلك و هذه مرحله تأسيس وبناء فاهتم بهم وبصحهم و لا تسمح لهم بأكل الشارع
فالمدرب كل هدفه ان يرى اولاد حضرتك احسن اولاد و يشاركك فى التربية فتكلم معه و ليس عليه لان الكلام بيوصله أيضاً
و ابعد عن المشاحنات وعن كلام المحيطين و اذا تواجدت فى جلسة فيها سيرة فلان سلم وامشى و اوعى تتكلم على حد لأن الكلام سيصله بعد دقيقتين وركز مع ابنك عشان جلسات النميمه لا داعى لها لأن هدفك هو نجاح ابنك اوعى حد يبعدك عن الهدف ده
و لا تستعجل نجاح ابنك وانه يفوز بدرى عشان تفرح فرحة السراب او الفرحة المؤقته لا فنحن نريدك ان تفرح فرحة مستمرة بنجاح ابنك فى العمومى و اخيرا اياك ان تستكتر حاجه على اى لاعب او لاعبة عشان ربنا يكرمك فى ابنك أو بنتك .. وحاول توفر لابنك مناخ جيد ومتخلهوش تحت ضغط
وإن شاء الله ربنا يوفق أولادكم وبناتكم ونشوفهم أبطال
