إعداد وتقديم مرفت عبد القادر
مطبخ الصوت
المقادير:
لتر لبن حليب بلدي
كوب سكر
كوب الاربع رز عليه 3 كوبايات ميه
معلقتين كبار قشطة
معلقتين كريم شانتيه
كيسين فانيلا
معلقتين كبار نشا.
الطريقة:
نغسل الرز ونضيف عليه الميه ونحطه علي النار لحد ما يغلي ونطفي عليه ونسيبه متغطي لحد ما يشرب كل الميه بتاعته
حوالي نص ساعة او اكتر.
كدا هيكون الرز استوا تماما.
نرجع نولع عليه تاني ونضيف الخلطة دي
في وعاء نخلط اللبن الحليب مع السكر والكريم شانتيه والقشطة واقلب كويس وانزل بيه علي الرز .
واسيبه علي النار المتوسطة علشان الرز يغلي مع كل دا و ياخد من طعمهم وتعلى الناااار عليه لاء خليه ياخد حبه كدا مع اللبن والسكر والقشطة والكريم شانتيه عشان تكون حباية الرز نفسها ليها طعم وجميله مش كأنها مسلوقه ومليانه ميه
تري
بعد خمس دقائق اقلب النشا والفانيليا في ربع كوب من الماء وانزل بيه واقلب قلب قلب بسرعة علشان ما يكلكعش معايا.
وافضل اقلب لحد مالقي القوام بقا سميك وجميل نغرف فى الأطباق ونزين الوش بجوز هند وزبيب أو اي نوع مكسرات عندك المهم نزينه وهوا سخن عشان المكسرات تلزق في الرز بلبن ومتقعش وممكن يبقى سادة بعد ما يبرد غطيه ودخليه الثلاجة والخطوة دى بتخلى الوش مكشكش .
وبألف هنا.
ملحوظة:
متكتريش النشا عشان مايبقاش الرز بلبن قوامه غليظ اوي هيبقى وحش حلاوته وهوا رابط علي خفيف كدا.
الرز بلبن يتغرف فور نزوله من علي النار قبل ما يمسك في بعضه.
الفانيليا بنضيفها في الاخر خالص مع النشا علشان ريحتها متروحش مع الغليان .
لازم تخليه يغلي شويه مع خليط السكر واللبن بدون استعجال عشان ياخد كل النكهة اللي في الخلطة.
