إعداد وتقديم//مرفت عبد القادر
مطبخ الصوت
لازم نعرف شوية تركات عشان البسبوسة نتطلع مظبوطة معاكي وهي:
اول حاجة : البسبوسة لازم الشربات بتاعها يكون خفيف يعني مايا بسكر مغلية وتتسقي وهيا لسه طالعة من الفرن يعني الشربات والبسبوسة سخنين بعد لما تطلع من الفرن وتسقيها لازم تغطيها بصنية علشان تبقى طرية ومش طلع ناشفة.
تاني حاجة: بتتعمل بسمنة وياسلام لو بلدي و معلقة الطحينة عشان اللون الذهبي .
ثالث حاجة : مابتتقلبش البسبوسة بعد إضافة اللبن عشان السميد مايطلعش الجلوتين اللي جواه ويعمل عرق وتنشف منك .
رابع حاجة: لما تيجي تقطعيها لازم لما تبرد خالص عشان ماتفرولش منك ويفضل تتاكل تاني يوم .
خامس حاجة :تسمي الله وتفتحي فرن درجه حراره 180 ونبدء.
المقاديـــــــــــــر :
2 كوب سميد سايب .
نصف كوب سكر ناعم.
نصف كوب لبن .
2 معلقة كبار جوز هند .
تلت كوب سمنه بلدى.
معلقة طحينة .
كيس بيكنج بودر صغير.
ذرة ملح .
معلقة كبيرة عسل الجلوكوز أو شربات تقيل او عسل ابيض.
الطريقـــــــــــــة:
اول حاجة هنجيب السميد والبيكنج بودر وجوز الهند وذرة الملح ونقلب كله مع بعض وبعدين ننزل بالسمنة ونبسه كويس اوي خلاص كل حبيبات السميد اتغلفت
ندفي اللبن ومعلقة عسل الجلوكوز ومعلقة الطحينة والسكر ونقلبهم مع بعض وننزل بيها على الخليط وماتعجنيش يادوب تقلبي المكونات مع بعض عشان ماتنشفش منك وتنزليها في صنية البسبوسة مدهونة طحينة برده .
وتضربي الصنية كام ضربة علي الرخامة وتدخليها الفرن على طول.
الشربات :
كوب ونصف ماية.
2 كوب سكر .
معلقة سمنة بلدي يادوب يغلو ويدبو مع بعض وتنزلي بيها بتغلي علي البسبوسة
من اسرار نجاح البسبوسة انها تشرب كل الشربات بعدين تغطيها وتشليها بالتلاجة لحد ماتبرد وبالهنا .
