طريقة عمل الكشري المصري
إعداد وتقديم مرفت عبد القادر
مطبخ الصوت
الطريقة:
في حلة علي النار فيها ميه وملح ومعلقة زيت ننزل بنص كيلو مكرونة مشكلة تتسلق .
في حلة علي النار نضيف معلقتين زيت وننزل بكوباية شعرية تتحمر ولما يوصل لونها للدهبي ننزل عليها بكوباية رز مغسول ونقلبه شوية لحد ما الرز يتشمع نغطي الرز ميه ونضيف ملح ونص معلقة توم مفروم ومكعب مرقة اختياري واول ما يتشرب الميه نهدي النار ونسيبه يستوي.
الصلصة في حلة هنضيف معلقتين زيت وعليهم معلقتين توم مفروم واول ما ياخد لون نضيف معلقتين صلصة طماطم
ومعلقة كمون وكسبرة ناشفة وملح ومعلقتين خل ومعلقة سكر عشان تعادل الحموضة وننزل عليهم بلتر من عصير الطماطم هنسبها تتسبك علي نار متوسطة .
للعدس نسلق العدس في ميه ونص معلقة كمون وملح وبعد مايتسلق نصفيه ونضيف عليه نص معلقة كمون ومعلقة طشة توم ونقلبه واحلي عدس ممكن تشوفوه.
للحمص كوباية حمص نسلقها في ميه ونضيف عليها طماطماية مقطعة صغير وكمون وكسبرة ناشفة ومكعب مرقة ومعلقة توم مفروم وبابريكا وشطة ونسيبه لحد ما يستوي.
الشطة معلقتين صلصة وعليهم معلقة شطة وكمون وملح ومعلقة زيت ونخففه بشوية ميه نرفعها على النار غلوة ونطفي.
للدقة نص كوباية خل وعصير 2 لمونة وملح وكمون وكسبرة ناشفة وميه ومعلقة توم مفروم نرفعهم على النار غلوةونطفي
ونغرف في أطباق التقديم بالشكل اللي تحبوه.
وبألف هنا.
