طريقة عمل كفتة الحاتي 

إعداد وتقديم مرفت عبد القادر

مطبخ الصوت

المقادير:

نص كيلو لحم مفروم

100 جرام دهن او لية ضاني ودي افضل بتدي نفس طعم الكفتة بتاعة المطاعم .

كمية البصل قد كمية اللحم نص كيلو بصل مفروم ناعم ونصفيه كويس من الماية.

ونسيب الماية علي جمب.

التوابل :

معلقة صغيرة ( ملح – فلفل اسود).

نص معلقة صغيرة بابريكا

ربع معلقة صغيرة ( كمون – كزبرة – قرفة ).

رشة جوزة الطيب.

معلقة صغيرة بيكنج بودر بتخلي الكفتة متكشش وهشة ومش مكتومة .

2 معلقة كبيرة بقسماط ناعم او دقيق عشان تخلي الكفتة تتماسك ومتفكش او بيضة .

واهم حاجة نعجن كل المكونات كويس جدا عشان انسجة اللحم تتماسك ومتفكش على السيخ.

نيجي لماية البصل نضيف عليها ملح وفلفل اسود وبابريكا ومعلقتين زيت .

ونبل بيها ايدينا واحنا بنصبع الكفتة سواء على السيخ او علي عصيان الشيش طاووق.

وتتشوي علي الفحم او في الفرن علي درجة حرارة 200.

ولما تتطلع نحط معاها فحمة ونغطيها عشان تاخد ريحة الشوي.

وبألف هنا.