مطبخ الصوت
أولاً: المقادير (لكيلو دقيق):
الدقيق: 1 كيلو دقيق فاخر (مخصص للكحك والبسكويت) = 8 أكواب ممسوحة بكوب الشاي العادي.
السمنة (سر الدوبان): 550 جرام سمنة مقدوحة (للكحك الدايب أوي) = 2 كوب ونصف بكوب الشاي.
الحليب أو الماء: 150 مل (كوب الا ربع) “ممنوع تزودي عشان ما ينشفش”.
السكر البودرة: 2 ملعقة كبيرة (تتحط مع الدقيق).
الخميرة: 1 ملعقة صغيرة.
ريحة الكحك: 1 ملعقة كبيرة (أو محلب مطحون لو تحبي).
السمسم: 3 ملاعق كبيرة (محمص نص تحميصة).
رشة الملح: ذرة بسيطة.
الطريقة بالتفصيل (أهم حاجة “البس”):
خطوة السمنة: لو عايزة طعم زمان وريحة تقلب البيت، “اقدحي” السمنة (سخنيها لحد ما تبدأ تغلي).
المواد الجافة: قلبي الدقيق مع السكر، ريحة الكحك، السمسم، ورشة الملح.
حفرة الدقيق: اعملي حفرة في نص الدقيق وانزلي بالسمنة المقدوحة (خدي بالك من إيدك) وقلبي بمعلقة خشب.
سر الصنعة (البس): بعد ما السمنة تبرد شوية، “بسي” الدقيق بالسمنة بين كفوف إيدك لمدة 15 دقيقة على الأقل.. لازم كل ذرة دقيق تتغلف بالسمنة لحد ما تبقى عجينة لينة في إيدك.
ذوبي الخميرة في الحليب الدافئ وانزلي بيها على العجينة، “لمي” العجينة بصباعك بس مش عجن.. أول ما تختفي السوائل وقفي فوراً.
التشكيل: كوريها وانقشي بالمنقاش او البصامة زي ما تحبى.
أسرار النجاح:
التسوية: الفرن يكون شغال قبلها بـ 10 دقائق على درجة حرارة 160 (هادية). الكحك السادة بياخد وقت أطول شوية،
واللي بالعجوة بياخد حرارة 180.
* النقشة: لو النقشة راحت في الفرن، يبقى الخميرة كانت كتير أو السمنة زيادة أوي أو متبسش كويس.
السكر: متحطيش السكر غير عند التقديم بس عشان الكحك ميتشربوش ويطرا.
وبألف هنا.
