اللى بيحصل النهارده في افتتاح المعرض الدولي الرابع للصناعات الدفاعية إيديكس 2025 مش مجرد فعالية كبيرة ولا حضور رسمي وخلاص.
هو خطوة محسوبة في طريق دولة بتحاول تبني نفسها من جديد بسلاح العقل قبل سلاح القوة.
ونجد أن وجود الرئيس عبد الفتاح السيسي في افتتاح المعرض كان رسالة واضحة إن مصر ماشية برؤية لها منطق ولها اتجاه ومش بترجع خطوة لورا مهما كانت التحديات حوالينا.
وشاهدنا الاستقبال الرسمي للرئيس من قادة أجهزة الدولة كان بيقول إن مؤسسات الدولة واقفة في صف واحد و بتشتغل بمنطق الفريق مفيش قرار بيتاخد لوحده ومفيش خطوة بتطلع من غير ما تكون جزء من صورة أكبر اسمها “مستقبل مصر”.
والحقيقة إن إيديكس بقى أكتر من مجرد معرض سلاح بقى ان مساحة مصر بتعرض فيها قدرتها على التفكير والتخطيط،
وقد إيه بقت عندها رؤية إن الأمن مش مجرد معدات بل صناعة واقتصاد وتكنولوجيا، وتواصل مع العالم و شراكات جديدة، وتجارب بتتراكم خطوة ورا التانية.
واللى لافت للنظر إن الدولة بقت واعية إن الصناعة الدفاعية مش بس قوة ردع.
لكنها كمان باب مهم لفرص شغل ونقل و معرفة وتطوير قدرات محلية وفتح أبواب كانت زمان مقفولة.
الحدث كله بيأكد إن الرئيس شايف الصورة من فوق شايف إن البلد لازم تبقى واقفة على رجلين:
رجل حماية… ورجل بناء.
لأن مفيش اقتصاد من غير أمن ومفيش أمن من غير دولة لها وزن و معاييرها واضحة.
في النهاية، “إيديكس 2025” نموذج لقدرة الدولة إنها تجمع العالم على أرضها وتقدم نفسها بثقة،
وتقول: إحنا رايحين لقدام بخطوات محسوبة و برؤية مش بس للنهارده لكن لبكرة وبعده.
