إعداد وتقديم مرفت عبد القادر
مطبخ الصوت
المقادير والطريقة:
هاتي ٣ كيلو زيتون تفاحي اغسلية كويس وفتحية ٣ فتحات بالطول وبعد كدا حطي عليه كيس ملح صغير او نص كيس ملح كيبر قلبيه في الملح وسيبة يوم كامل ٢٤ ساعة.
الزيتون ينزل المرارة اللي فيه تاني يوم اغسلية كويس تحت الميه وافرمي كيلو فلفل احمر بارد مع ٥ فصوص من الثوم في الخلاط مع كوباية ميه عشان يتفرم معاكي علي طول أو افرميه في الكبة حطي الفلفل المفروم علي الزيتون.
وقطعي ٢ كيلو ليمون اصفر اربع تربع وحطية عالزيتون وحطي عليه نص كيلو فلفل شطة واعصري كيلو ليمون اصفر وحطيه علي الزيتون عشان بيمنع المرارة وحطي شويه قشر الليمون اللي عصرتيه علي الزيتون وسيبى شوية نغطي بيه وش الزيتون في البرطمان .
حطي كمان علي الزيتون رشة كسبرة ناشفة ومعلقتين كبار حبة البركة وكام واحدة من ورق اللورا و٣ حبات من الجزر المبشور.
وتحطيه علي الزيتون قلبي كل دا في بعضه وهاتي برطمان أو جردل وحطي الزيتون فية هاتي بقا طبق وحطي في ميه عادية من الحنفية وفيها ملح لكل كوب مية معلقة كبيرة مسح ملح ومعلقة صغيرة سكر بتديلو قرمشة وتعتبر مادة حافظة وطعمها مش بيبان خالص في الزيتون بس بلاش تحطي خل عشان بيمور الزيتون ( بينعمة ).
قلبي المية مع الملح وحطيها علي الزيتون وحطي علي وش الزيتون بقيت قشر الليمون اللي عصرناه وحطي علي وشه ربع كوب زيت عشان ميعملش ريمة اقفلي عليه كويس وبعد عشرين يوم تاكلي منه .
وبالف هنا .
