إعداد وتقديم/مرفت عبدالقادر احمد
طريقة عمل هريسة الفلفل والمقادير:
كيلو من الفلفل الرومي والشطة فلفل احمر واخضر اغسلية كويس وقطعيه وشيلي منه العنقود الاخضر .
حطي كمية في الكبة علي قد ما هتاخد وحطي عالفلفل راس ثوم متوسطة متقشرة ومعلقة ملح كيبرة ( كيلو الفلفل بياخد ملعقتين ملح كبار ) بعد كدا افرمي الفلفل والثوم بس متنعمهوش اوي عشان الفلفل مينزلش مية كتير بعد الفرم.
اعصري علي كيلو الفلفل المفروم 3 ليمونات وحطي ربع كوب خل وربع كوب زيت ومتحطيش توابل عشان التوابل بتغمق هريسة الفلفل وبتغير طعمها حطي التوابل وقت الاستخدام وقلبي هريسة الفلفل في بعضها وحطيها في برطمان او علبه واحفظيها في الفريزر هتقعد معاكي شهور وقبل الاستخدام طلعيها قبلها بشويه عشان تفك تاخدي منها علي قد استخدامك وتحطي عليها التوابل بتاعتك ودخلي بقيت هريسة الفلفل تاني الفريرز.
هريسة الفلفل منجزة جدا هتنجز معاكي في جميع الاكلات زى البامية والبتنجان ودقة السمك وكل حاجه انتي بتحطي فيها هريسة الفلفل هتكون تحت ايديكي وجاهزة علطول ليكي .
