إعداد وتقديم مرفت عبد القادر
مطبخ الصوت
هنجيب الخلاط ونحط بصلة متوسطة وخمس فصوص ثوم وكوباية خضرة مشكلة مقطعة شبت وبقدونس وكسبرة وقرن فلفل حار او بارد ونحط كوباية ميه .
هنضرب كويس جدا لحد ما الخليط ينعم ننزل بربع كيلو لحمة مفرومة اى نوع جملى عجالى مجمدة على حسب المتوفر ونضرب تانى .
هتجيبى 2 كوب رز واطحنيهم من غير ما يتغسل فى مطحنة الخلاط يفضل رز الأكياس أو ممكن تستخدمى
دقيق الرز لو متوفر .
هاتى طبق وحطى الرز المطحون وخليط اللحمة اللى فى الخلاط وحطيه على الرز وضيفى ملح وفلفل اسود وكمون وكسبرة جافة وبهارات وربع م ص بيكنج بودر وقلبى كويس.
حطيها فى الثلاجة تتشمع ساعتين او نص ساعة فى الفريزر.
وصبعى الكفتة وادهنى ايدك زيت ورصيها فى صينية واقلى .
الكفتة فى الزيت وحطيها فى الصلصة مع رز بشعرية .
ملاحظة :
– ليه بقول تستخدموا رز الاكياس او دقيق الرز علشان يتشرب كوباية الميه اللى حطيناها فى الخلاط لو رز مغسول مش هيشرب الميه لانه فيه ميه.
– لو لاقيتى عجينة الكفتة لسة طرية بعد ما تتطلعيها من الثلاجة زودى كام معلقة بقسماط او دقيق.
– ممكن تستخدموا بدل اللحمة ربع كيلو من صدور الفراخ هتبقى حلوة جدا لو مش متوفر لحمة.
