إعداد وتقديم مرفت عبد القادر
مطبخ الصوت
سمك المكرونة صغير جدا اصغر حجم في السمك المكرونة بيكون رفيع بس بيكون طعمه احلي من الكبير وبيكون شبه الجمبري وقريب من طعمه وعلي فكرة تقريبا السمكة بتتاكل علي مرة واحدة.
المهم بنجيب السمك اهم حاجة هاتوه طازة عينه بتلمع ولونه بيلمع ومتماسك وريحته حلوة .
وطبعا ده انت الي هتنضفيه لان المحلات او إلي بيبعيوه مش بيرضوا ينظفوه عشان بياخد وقت شوية بس هو تنظيفه سريع نظفي منه القشور وافتحيه ونظفيه من جوه واشطفيه كويس جدا ويتصفي علي مصفاة واعصري عليه عصير ليمونة وتبلي بملح وكمون وثوم مفروم زي تتبيلة السمك العادية .
وبعدين هاتي شوية دقيق في طبق واسع وانزلي بجزء من السمك قلبي في الدقيق كويس وبعدين ارفعيه نفضيه اوي وتكوني بتسخني زيت بس يكون غزير في حلة او طاسة صغيرة عشان متاخدش زيت كتير الطاسة الصغيرة بتكون اوفر يعني يتسخن كويس جدا وننزل بجزء من السمك بعد ما تنفضيه كويس من الدقيق وهنا بقي مش نقلب خالص الزيت غزير.
فبيكون السمك متحوط بالزيت كويس لما ياخد اللون الذهبي ببتدي اقلب السمك عشان ميتكسرش يعني بقلبه مرة واحدة ونرفعه علي مصفاة او ورق مطبخ وبالهنا احلي سمك طعمه زي الجمبري لو جبتوه طازة.
