إعداد وتقديم مرفت عبد القادر
مطبخ الصوت
باذنجان وفلفل مقلى بالدقة
عشان البتنجان مايشربش زيت لازم بعد مانغسله و نقشره و نقطعه شرايح متوسطة تكون و لا تخينة و لا رفيعة نرش عليه شوية ملح ونقلبه كويس ونسيبه حوالى نص ساعة او ساعة الا ربع هنلاقيه دبل شوية وعمره ماهيشرب زيت ابدا.
الطريقة:
نغسل البتنجان من الملح عشان مايبقاش حادق
و نحطه فى مصفى عشان يصفى المايه قبل القلي عشان ميفرقعش فى الزيت .
نقلى البتنجان و الفلفل الرومى ( صحيح بدون تقطيع ) وكام قرن فلفل حراق فى زيت ذره أو دوار شمس .
نسوي البتنجان على درجة حرارة متوسطة ( بيفرق كتير فى الطعم و لون البتنجان) بس نخلى بالنا الفلفل بيفرقع شوية فى الزيت .
نطلع البتنجان والفلفل من الزيت على مناديل مطبخ و نسيبه يبرد شوية .
نجيب سرفيس و نرص فى الأرضية طبقة بتنجان و فلفل رومى جنب بعضها و بعدين نرش شوية دقة فوق البتجان والفلفل الرومى بالكبشة و هكذا نعملها طبقات فوق بعض نرص طبقة بتنجان وفلفل رومى جنب بعض و نرش فوقهم الدقة بالكبشة لغاية مانخلص كمية البتنجان و الفلفل كلها .
ورشة طحينة بيضاء علي الوش
مكونات و طريقة الدقة:
( هنضع المكونات دى فى طبق او بولة غويطة ).
عدد 2 طماطم مكعبات + معلقة كمون كبيرة + معلقة كسبرة كبيرة ناشفة + 5 فصوص توم مفروم ناعم + نص كوب خل + عصير ليمونة و ندوق لو محتاجة ملح نحط مش محتاجة خلاص عشان مايطلعش حادق .
وبألف هنا.
