يس النحافة
ما تقفليش شباكِك
العمر لسه بيبتدي
ما تقفليش شباكك
الليل لابد هينقضي
و ما تهربيش م النور
ولا ترفضيه
ماتخنقيش قلبِك و تبكي
في الخفا
دمِعك وفــا
مش دي الجراح اللي تساويه
طلِّي بمشاعرِك ع الطريق
و اتأملِّى
هتلاقى عاشق مبتلى
قلبه ما يعرف م الهوى
إلا الهوى من يمّ شباكِك
ماتقفليش شباكِك
ما بين ضلوعِك محزنة
بتدارى ليه مَ تبوحي
انا أصلي من كُتر السكات
مات بوحي
يا قلبها روح قول لها :
قلبه ده مدبوحي
كان طير و شارد في الفضا
عطشانة روحه فضفضة
صالحه القضا
و اصطاده بشباكِك
ماتقفليش شباكِك
ماتدوبيش قلبِك شجون
لو رمش خان
ماتخونيش كل العيون
مدِّي الإيدين للفجر و اتحنِّي
بنَداه
و اهدي شروق شمسين عنيكِ
للنهار
حلِّى المرار وإبتسمي
ياااااااه
لوتعرفي إن ابتسامتِك دي
حياه
ماتقفليش شباكِك!
