تخليل البساريا أو الملوحة البلدى هتاكلى منها تانى يوم
مطبخ الصوت
علشان نملح البساريا وتكون طعمها حلو جدا ولونها جميل ومش حادقه قوي امشي على الخطوات دي وادعيلي بقااا..
اول خطوة
واهما غسيل البساريا في ناس تقولك متغسلهاس اوعي تسمعي كلامهم.
في مصفى توضع البساريا وتحتيها طبق ونشغل الحنفيه عليها ونسيبها لحد ما تنزل كل الزفاره اللي فيها ولون الميه يكون فاتح
تاني خطوة
تنشيف البساريا كويس جدا
توضع فى مصفى ونسيبها براحتها خالص لحد ما تنزل كل الميه اللي فيها والخطوه دي مهمه جدا ونجيب مناديل مطبخ ونحاول ننشف كل المايه منها نهائي بالتجفيف
ثالث خطوة
تخليل او تمليح البساريا لكل كيلو بساريا
٣ معلقه ملح كبيره خشن لو معندكيش ملح ناعم عادي
ومعلقه كبيرة بابريكا علشان تدينا اللون القمر ده
ورشه شطه ورشه كركم و٢ من ورق اللورا
وفنجان زيت
هنقلب كله مع بعضه كويس جدا ونحطها فى جردل بلاستيك او في برطمان زجاج مغسول بميه ومتعقم ومتنشف كويس جداا
ونغطيها كويس بمعلقتين زيت واقفلي البرطمان كويس جدا وسيبيه لمده يوم فى الصيف و3 ايام
فى الشتا هتاكلي احلي بساريا
بألف هنا
