الناس فاكرة إن مفتاح الجنة محفور على باب مسجد لسه هيتبني
وإن اللي يتبرع بـ 100ج لوحتي 100 ألف عشان يحط اسمه على رخامة الجامع ضمن الفردوس
والحقيقة؟
المساجد كترت والقلوب فاضية والمتاجرة باسم الميت بقت سبوبة
1 المساجد كترت والعقول فاضية
النبي صلي الله عليه وسلم قال
لا تقوم الساعة حتى يتباهى الناس في المساجد
بص حواليك في كل شارع 3 جوامع وفي كل جامع 5 صفوف فاضية
بنبني حيطان وسجاد ومكيفات وبننسى نبني بني آدم
المسجد اللي جنبه جاهل وجعان ومريض ده مسجد شاهد علينا مش لينا
الله سبحانه قال
{إِنَّمَا يَعْمُرُ مَسَاجِدَ اللَّهِ مَنْ آمَنَ بِاللَّهِ وَالْيَوْمِ الْآخِرِ} التوبة 18
يعمرها يعني يصلي فيها يعلم فيها يذكر فيها
مش يصب فيها خرسانة ويسيبها فاضية عمارة المسجد بالبشر مش بالحجر
2 الصدقة الجارية أوسع من المحراب
النبي صلى الله عليه وسلم حدد أبواب الخير اللي ما بتتقفلش
إذا مات ابن آدم انقطع عمله إلا من ثلاث صدقة جارية أو علم ينتفع به أو ولد صالح يدعو له رواه مسلم
خد بالك قال صدقة جارية وسابها مفتوحة
ما قالش مسجد
العلماء قالوا الصدقة الجارية هي كل نفع مستمر
بير ميه شجرة مثمرة مدرسة مستشفى كتاب سرير في دار أيتام
ابن عثيمين قال بناء المساجد من الصدقة الجارية وكذلك بناء المدارس لطلب العلم الشرعي وطباعة الكتب كل هذا من الصدقة الجارية
يعني المدرسة = المسجد في الأجر لو النية لله والنفع مستمر
3 فقه الأولويات شبّع بطن وبعدين ابنِ جامع
سيدنا عمر بن الخطاب أوقف حد السرقة في عام الرمادة ليه؟
لأن الجوع أولى من الحد
والفقهاء قالوا قاعدة ذهبية
درء المفاسد مقدم على جلب المصالح
إيه الفايدة من قبة ومئذنة وتحتها طفل مش لاقي كراسة يكتب فيها؟
إيه الفايدة من نجف كريستال وتحته أم مش عارفة تعالج ابنها؟
النبي صلى الله عليه وسلم قال
أنا وكافل اليتيم في الجنة كهاتين وأشار بالسبابة والوسطى
ما قالش أنا وباني المسجد
وقال من سلك طريقاً يلتمس فيه علماً سهل الله له به طريقاً إلى الجنة
يعني الطريق للجنة ممكن يعدي من فصل مدرسة مش لازم من صحن جامع
4 سبوبة اتبرع للمتوفي
بقت موضة واحد يلم تبرعات لبناء مسجد صدقة على روح فلان
طب سألت نفسك الميت محتاج إيه؟
الميت محتاج دعوة صادقة علم يُنتفع به ولد صالح
لو كان ابنك فاشل وجاهل مسجدك مش هينفعه
لكن لو علمت 100 طفل دعوتهم هتوصله
القرآن قال
{وَأَن لَّيْسَ لِلْإِنسَانِ إِلَّا مَا سَعَى} النجم 39
سعي الميت وقف
سعيك انت اللي ينفعه
فاختار السعي اللي أثره أعمق
تعلم واحد = تفتح بيت تنقذ جيل توقف سلسلة فقر
الخلاصة في الكبسولة
1 الجنة مش للبيع ومفتاحها مش رخامة عليها اسمك
مفتاحها نفع
2 المسجد اللي جنبه مدرسة خربانة ده شاهد زور
ابنِ المدرسة الأول وخلي خريجها هو اللي يعمر المسجد
3 عايز تنفع ميتك؟
علم له اكفل يتيم باسمه اطبع مصحف بتفسير يفهمه الناس ده اللي يوصل
4 قبل ما تتبرع اسأل
البلد محتاجة مئذنة ولا محتاجة معمل علوم؟
محتاجة سجادة ولا محتاجة سرير عناية؟
قال تعالى {وَتَعَاوَنُوا عَلَى الْبِرِّ وَالتَّقْوَى} المائدة 2
والبرّ اليوم إنك تطلع بني آدم فاهم شبعان متعلم عشان لما يدخل المسجد يبقى فاهم هو بيقول إيه
