لاجل ما تعيش الأميرة
الخدم لازم تموت
أما حاشيتها الكبيرة
كلها ياناس كيوت
لاجل تتهنا في نومه
كل غلبان تسلخوه
ولا يوم تقوم له قومه
لجيبه دايما نفضوه
لاجل ما تِكتر همومه
يبقا دايما فى مشاكل
حتى لو حيبيع هدومه
ولا حتى لبعضه ياكل
لاجل أميرتنا الكريمة
تعلا رايتها لفوق
الفقير ما يكون له قيمة
أو من الأحزان يفوق
ليل نهار عَد ف نجومه
كهربا وميه وغاز
ورغيفين دول قوت ليومه
لو بملح دا يبقا فاز
عاوز إيه تاني المواطن
غير يعيش بس بأمان
لو في جُحر حيبقا ساكن
يحمد الله على اللي كان
الصراحه مالوهش فايدة
خسارة حتى لُقمته
منه مافيه غير مكايدة
ولا فى علاج دوشته
والخلاص منه ضرورة
بأي شكل وأي لون
مهما كان وبأي صورة
والأميرة بخير تكون.
