إعداد وتقديم مرفت عبد القادر
مطبخ الصوت
هنجيب كيلو سبانخ وحزمتين كزبرة خضرة هنقى السبانخ والكزبرة من أى ورقة صفراء ونغسلها كويس جدا ازاى بنملى طبق كبير بالماية ونغطسها فيه علشان كل الطين والشوائب تنزل ونغير الماية كذا مرة وفى أخر غسلة نحط معلقتين خل فى الماية ونشطفها ونحطها فى مصفى.
الطعم والريحة كلها فى الرأس بتاعتها بخرط الرأس قطع صغيرة جدا علشان تستوى كويس مع الورق وبكمل تقطيع السبانخ والكزبرة .
هنحط حلة على النار وننزل بمعلقتين سمنة وبصلة مكعبات واول ما تصفر ننزل بكيلو من عصير الطماطم ونحط معلقتين رز مغسول ومنقوع نحط فلفل اسود وبهارات وبابريكا وحبهان وورق لورا مطحون وملح .
نسيب الطماطم لحد ما تتسبك والرز يستوى ننزل بالسبانخ والكزبرة ونقلب لحد ما حجمها يقل نضيف اللحمة المسلوقة ونخفف الصلصة بشوية شوربة لما تستوى نقفل عليها.
نعمل الطشة سمنة وثوم مفروم وقرن فلفل حار سليم ولما اللون يصفر ننزل بالكزبرة الناشفة ونقفل النار ونحطها على السبانخ وبنعمل جنبها شوربة لسان عصفور و بالعيش والف هنا .
