مطبخ الصوت
المقادير:
كيلو مكرونة قلم
نص كيلو لحمة مفرومة
بصلة كبيرة مفرومة
فصين توم مفرومين
كوباية عصير طماطم
ملح وفلفل وبهارات لحمة .
للبشاميل:
لتر لبن
٤ معالق كبيرة دقيق
٤ معالق كبيرة سمنة أو زبدة
مكعب مرقة (اختياري)
جبنة موتزاريلا أو رومي مبشورة (للوش) .
الطريقة:
نسلق المكرونة نص سلقة ونخليها على جنب.
في طاسة على النار، نشوح البصل والتوم لحد ما يدبلوا، ننزل باللحمة المفرومة ونقلب لحد ما لونها يتغير.
نضيف عصير الطماطم والملح والفلفل والبهارات ونسيبها تتسبك حبة.
للبشاميل: في حلة على النار نسيح السمنة وننزل بالدقيق ونقلب لحد ما ياخد لون دهبي خفيف.
ننزل باللبن بالتدريج ونقلب كويس أوي بالمضرب السلك عشان ميكلكعش، ونضيف مكعب المرقة والملح والفلفل لحد ما القوام يتقل.
في صينية بايركس، نحط طبقة بشاميل، بعدين نص كمية المكرونة، بعدين اللحمة المفرومة، بعدين باقي المكرونة، وأخيرًا نغطي الوش كله بالبشاميل.
نحط الجبنة على الوش وندخلها فرن سخن على درجة حرارة 200 لحد ما تاخد لون دهبي.
وبالف هنا.
