أربعينية الشتاء هي الفترة اللي المصريين زمان كانوا بيحسبوا فيها عزّ البرد، أربعين يوم وأربعين ليلة، بتبدأ غالبًا من 25 ديسمبر وبتخلص مع 2 فبراير، واعتبروها قمة الشتاء الحقيقي، لما البرد يوصل لأقصى درجاته، وده مش كلام عشوائي، ده تقويم اتبنى على ملاحظة سنين طويلة للطقس وتأثيره على الزرع والناس والحياة اليومية.
تقسيم ذكي للبرد.. الليالي البيضا والسودا
المصري القديم ما كانش بيعد الأيام وخلاص، ده قسّم الأربعينية مرحلتين، الليالي البيضا والليالي السـودا، وكل مرحلة ليها طبعها وبردها.
الليالي البيضا مدتها 20 ليلة، وبتتميز ببرد جاف وصقيع واضح، وغالبًا السما بتبقى صافية، واتقسمت هي كمان لنوعين، أولهم 10 ليالي اسمهم “كوالح”، من 25 ديسمبر لـ3 يناير، ودي أشد أيام البرد قسوة، وبعدها 10 ليالي “طوالح”، من 4 لـ13 يناير، بردها أقل حدة لكنه طويل ومتعب.
بعدها بتيجي الليالي السـودا، 20 ليلة كمان، واتسمّت كده لشدة برودتها واعتماد الناس فيها زمان على النار للتدفئة، واتقسمت لـ10 ليالي “موالح” من 14 لـ23 يناير، والبرد فيها بقى مألوف شوية، وبعدها 10 ليالي “صوالح” من 24 يناير لـ2 فبراير، ودي بتبشر ببداية تحسن بسيط في الجو.
بعد الأربعينية.. البرد ما بيخلصش مرة واحدة
بانتهاء الأربعينية ما بنفوقش فجأة، بتيجي فترة اسمها “العزازة” من 2 لـ11 فبراير، جوها متقلب بين برد ودفا، وبعدها 3 أيام معروفين باسم “قرة العنز” لحد 14 فبراير، وكانوا زمان بيعتبروهم من أخطر أيام الشتاء، خصوصًا على الماشية.
تحذيرات من برد قارس وشبورة
التوقعات بتقول إن الموجة دي مصحوبة برياح باردة بتزود الإحساس بالبرد، مع شبورة مائية كثيفة على الطرق، خصوصًا القريبة من المسطحات المائية، وده يستدعي الحذر في القيادة، خاصة في الطرق السريعة والمناطق المكشوفة.
الزراعة في مواجهة الصقيع
الانخفاض المفاجئ في الحرارة ممكن يأثر على بعض المحاصيل، وعلشان كده المختصين بينبهوا بضرورة اتباع الإرشادات الزراعية، وحماية الزرع من الصقيع، خصوصًا في الأراضي المفتوحة والجديدة.
ليه الأربعينية أبرد وقت في السنة؟
رغم إن الشتاء فلكيًا بيبدأ في ديسمبر، إلا إن أقصى برودة بتيجي بعد الانقلاب الشتوي، لأن الأرض والبحار بتحتاج وقت علشان تفقد الحرارة المخزنة من الصيف والخريف، ومع تراكم البرودة، توصل الذروة خلال الأربعينية.
تقويم شعبي عايش لحد النهارده
أربعينية الشتاء، أو “المربعانية” زي ما معروفة شعبيًا، مش مجرد مصطلح قديم، ده تقويم مناخي ورثناه عن أجدادنا، ولسه ناس كتير بتعتمد عليه لفهم الجو والا
ستعداد لأصعب أيام الشتاء.
