أيمن عبده
لما العاشق نن عيونها يحبها حب بكل جنون
يسرح فيها الليل ونهاره بيسرح فيها كما المفتون
لما يشوفها الدنيا بحالها ولما يحسها كل الكون
يبقى العاشق حب البنت الحب الساكن في المكنون
حب مضارع مش مرفوع مضموم بالضمة
هي لوحدها بالنسباله الناس واللمة
لما يدوق من شهد حنانها بيسكر حتى يتوه عن نفسه
“قالت لا تأخذني بعنف مهلا مهلا”
“قال الشوق يجرني نحوك غصب غصبا”
سطر بسطر وكلمة بكلمة وشوق بالشوق
طيب مين في الحب اتمنى بإنه يفوق
لما بتزرع كل بذور النور في كفوفها
وبتسقيها بروح بتخايل دايما طيفها
لما بتحصد زرعك جنة ازاي توصفها
توصف بس ازاي مشاعرها ازاي ح تشوفها
لما العاشق حس الحس اللي ملوش حس
قال دا الحب وطبع الحب بيهمس همس
مشتاق بس ف عز البرد يروح للشمس
ينده كل شعاع بيدفي اليوم والأمس
يحلم بكره اللي بيشتاق للحلم معاه
يسمع صوت البنت في روحه بتترجاه
خليك جنب النور الهالل م الشباك
لما مشاعري تنادي عليك تنظر تلقاك
أيوه بقول لك ملء الفم وملء الشوق
زي ما قلبك حاسس بيا بيتمناني
قلبي كمان مشتاق لوجودك واتمناك.
———-
