مطبخ الصوت
المقادير
لتر لبن حليب بلدي
كوب سكر
كوب الاربع رز عليه ٣ كوبايات ميه
معلقتين كبار قشطه
معلقتين كريم شانتيه
كيسين فانيلا
معلقتين كبار نشا
الطريقة
نغسل الرز ونضيف عليه الميه ونحطه علي الناااار لحد ما يغلي ونطفي عليه ونسيبه متغطي لحد ما يشرب كل الميه بتاعته
حوالي نص ساعه او اكتر
كدا هيكون الرز استوا تماما
نرجع نولع عليه تاني ونضيف الخلطة
في وعاء نخلط اللبن الحليب مع السكر والكريم شانتيه والقشطه واقلب كويس وانزل بيه علي الرز
واسيبه علي الناااار المتوسطه علشان الرز يغلي مع كل دااا و ياخد من طعمهم
متستعجليش وتعلى الناااار عليه ..
لاء خليه ياخد حبه كدا مع اللبن والسكر والقشطه والكريم شانتيه عشان تكون حباية الرز نفسها ليها طعم وجميله مش كأنها مسلوقه ومليانه ميه
تريكه بسيطه بس بتفرق اوي صدقيني
بعد خمس دقائق اقلب النشا والفانيليا في ربع كوب من الماء وانزل بيه واقلب قلب قلب بسرعه علشان ما يكلكعش معايا
وافضل اقلب لحد مالقي القوام بقا سميك وجميل نغرف فى الأطباق ونزين الوش بجوز هند وزبيب أو اي نوع مكسرات عندك المهم نزينه وهوا سخن عشان المكسرات تلزق في الرز بلبن ومتقعش وممكن يبقى سادة بعد ما يبرد يدخل الثلاجة
متكتريش النشا عشان مايبقاش الرز بلبن قوامه غليظ اوي هيبقى وحش حلاوته وهوا رابط علي خفيف كدا
الرز بلبن يتغرف فور نزوله من علي النار قبل ما يمسك في بعضه
الفانيليا بنضيفها في الاخر خالص مع النشا علشان ريحتها متروحش مع الغليان
تخليه يغلي شويه مع خليط السكر واللبن بدون استعجال عشان ياخد كل النكهه اللي في الخلطه
انا كدا عملت اللي عليا بقا اعملي اللي عليكي بقا واعملي شير ولايك للصفحه عشان يوصلك كل جديد
