طريقة عمل البسبوسة من غير لبن ولا زبادي

إعداد وتقديم مرفت عبد القادر 

مطبخ الصوت

 المقادير:

3 كوب سميد

كوب سكر

كوب سمنة

كوب ماء

الشربات:

كوب ونص سكر

كوب ونص ماء

نص عصير ليمونة

الطريقة:

حطي مكونات الشربات على النار يغلوا خمس دقايق واقفلى النار.

طريقة البسبوسة:

حطى كوب السكر فى طاسة وسبيه يكرمل انزلى عليه بكوب الميه فى الأول هيجمد قلبى لحد ما السكر يدوب تانى فى الميه حطى السمنة اول ما تسيح اقفلى النار.

فى طبق حطى دقيق السميد ومعلقتين جوز هند اختيارى وقلبى انزلى عليهم بخليط الميه والسكر وقلبى بسيط يدوب تجمعى المكونات ادهنى صينية بالسمنة وصبى الخليط اخبطى الصينية على الرخامة علشان تساوى السطح ممكن تضيفى مكسرات.

غطى الصينية بكيس وسبيها بقى ساعتين قبل ما تدخليها الفرن بعد كده دخليها فرن ساخن واول ما الجوانب تتحمر اقفلى الفرن وشغلى الشواية تاخد لون.

خرجيها من الفرن ضيفى الشربات ساخن وغطيها وسيبها لحد ما تبرد تماما .

وبألف هنا.