إعداد وتقديم مرفت عبد القادر
الطريقة:
اولا : بنغسل البطاطين بطريقتنا المعتادة في طبق بلاستيك كبير او في البانيو وبنبدأ باننا نحط كيس مسحوق ومعاه ربع كوباية كلوركس الوان ومعلقتين كبار بيكربونات الصودا اللي هي الكربوناتو والاضافات دي مع بعض هتضمنلك ان لابقع ولا روايح .
من غير دعك واملي البانيو او الوعاء تلات ارباعه ميه دافئة مائلة للسخونة ومتخافيش مش هتضر البطانية بالعكس دي هتساعد على ان البطانية تنضف اسرع وتنزل كل ال فيها.
بعد ما الميه تتعبى والاضافات تدوب كويس.
نزلي البطانية واضغطي بالمساحة او ايد الشرشوبة وبلاش ايدك ورجلك عشان الالتهابات.
هنسيبها منقوعة من بليل للصبح او العكس مع الضغط عليها كل مدة بالمساحة برضو او ايد الشرشوبة بعد كده بنشطفها كويس ونغير الميه كذا مرة.
.الشطفة الاخيرة مهمة جدا.
هتملي البانيو او الوعاء ال فيه البطانية ميه دافئة..وهتحطي نص كوباية داوني او كمفرت ولو مفيش حطي ربع كوباية بلسم شعر او شاور چل ومتقلقيش من الرغوة
لو مفيش برضو ضيفي حبة ديتول او زيت عطري وقلبي ودوسي وسيبيها ساعة كمان بعد كده صفي الميه منها ومتشطفيش تاني.
هنسيبها تتصفى على كرسي بلاستيك جوا الحمام وبعدها بننشرها فالشمس يومين او لحد متنشف تماما وتنفش كده وريحته تملا الدنيا وقلبيها علي المنشر مرة فاليوم.
بعدها بتاخديها تتطبقيها وتحطي جواها صابونة حمام محطوطة في فردة شراب عشان تحميها من العتة والحشرات وتحافظ عالريحة او مكعب مسك بالغلاف وطبقيها وحطيها فالشنطة بتاعتها او لفيها بملاية وفي الدولاب اوفي كيس كبير و تحت السرير وموجود شنط للبطاطين فالمحلات اسعارها رخيصة.
