طريقة عمل الغريبة 

إعداد وتقديم مرفت عبد القادر 

مطبخ الصوت

مش بتتعمل بالزبدة نهائي ومش بتتعجن و اعرفوا ان الدقيق ضعف السمنة.

المقادير :

 كوبايتين دقيق

 و كوب سمنة ونص كوب سكر بودر

لازم يكون منخول بعد الطحن وفانيليا .

الطريقة:

اولا :

السمنة تكون من الثلاجة بس مش مجمدة نحط عليها السكر نضربهم بالمضرب كويس جداً لما الخليط يبقى كريمي وبعدين نضيف الفانيليا في اخر مرحلة للخفق .

ثم ننخل الدقيق وننزل بيهم على خليط السمنة ونقلب لحد مالدقيق يختفي

 نلم العجينة مش نعجن

بتكون بتلزق شوية وناعمة خالص ونسيبها ترتاح شوية في الثلاجة ربع ساعة .

وبعدين نشكلها على شكل كور ولو عاوزين تزينو الوش ممكن لوز او لولي فضي او قرنفل مسمار او سوداني اي مكسرات تحبوها.

 ندخلها الثلاجة بعد التشكيل

 درجة حرارة الفرن هادية عشر دقايق بس، مش بتاخد لون تخرج من الفرن ماتحركهاش خالص لحد ماتبرد.

وبألف هنا.

ملحوظة مهمة :

لو ذاد السكر فى عجينة الغريبة بتنشف علشان كدة بقلل السكر.

الغريبة مش بيتحط فيها ولانشا ولا بيض ولا بيكنج بودر .

وانتي بتشتغلي في الغريبة لو حسيتي ان العجينة فرولت منك طريها بين ايدك هترجع طرية ومش هتشقق .

الغريبة لو فرشت يبقا السمنة زيادة

لو شققت يبقا الدقيق زيادة

لو لزقت في ايدك أثناء التشكيل يبقا تتحط في الثلاجة شوية.