طريقة عمل الفطير المشلتت 

إعداد وتقديم مرفت عبد القادر 

مطبخ الصوت 

المقادير:

كيلو دقيق

نصف معلقة ملح صغيرة

معلقة كبيرة سكر

حوالي كوبين ونصف ماء دافي بسيط

سمنة بلدي للفرد.

الطريقة :

– ننخل الدقيق ونضيف عليه السكر والملح ونضيف المياة بالتدريج ونعجن كويس جداً حوالي 20 دقيقة لحد ما العجينة تمط.

 وبعدين نكورها كور متساوية في حجم حبة اليوسفي تقريباً وندهنها زيت ونسيبها ترتاح شوية..

– ندهن الرخامة زيت ونفرد كورة كويس وندهنها سمنة بلدي ونطبقها ظرف والكورة الثانية نفردها كويس وندهنها سمنة بلدي.

 (كل ما زودنا الكمية هيبقى أحلى طبعاً).

 ونحط فيها الظرف الأول وندهن سمنة وقشطة ونطبق عليه الظرف التاني والكورة التالتة نفردها وندهنها ونحط اللي طبقناهم جواها وهكذا لما نخلص 3 أو 5 كور حسب الحجم اللي عايزينه.

– نسيب الفطيرة ترتاح شوية وبعدين نفردها وندخلها فرن حامي جداً لحد ما تستوي وتاخد لون ذهبي جميل وأول ما تطلع من الفرن ندهنها زبدة ونغطيها.

– ممكن نسويها في الطاسة مع مراعاة تغطيتها وتقليبها على الجهتين واول ماتنزل من على النار تتدهن زبدة وتتغطى عشان تفضل طرية .

وبالف هنا .