طريقة حفظ الجبنة القريش
إعداد وتقديم مرفت عبد القادر
مطبخ الصوت
كلنا بنشتري جبنة قريش وبتبوظ بسرعة عشان نحافظ عليها هقولك علي طرق
الحفاظ عليها او الاستفادة بيها.
اول طريقة :
تغلي مية ولما تبرد حطي شوية شطة ناشفة وملح او قرن فلفل اخضر متقطع
هتفضل زي ما هي من غير طعمها ما يتغير بالعكس هتاخد طعم الفلفل .
تاني طريقة:
تغلي مية وتبرد ودوبي فيها معلقتين لبن بودرة عمرها ما هتعمل ريم.
تالت طريقة:
زهقتي من طعمها اضربيها في الكبة مع معلقتين لبن بودرة وشوية لبن
وملح وشوية زيت وضيفي أي طعم قرن فلفل اخضر او حبة البركة هيبقي عندك أحلى جبنة كريمي اقتصادية.
رابع طريقة:
لو كمية كبيرة ومش هتحتاجيها كلها رشي عليها ملح وشطة وسبيها في مصفي تتصفي
يوم كامل وحطيها في لبن مغلي ومتبرد عليه شوية شطة وكركم وملح وشوية بابريكا
وبقي عندك أحلى جبنة قديمة بالمش بتاعها
ويا سلام بقي لوعندك شوية مورتة تزوديه بيها هتاكلي احلي طعم جبنة قديمة.
