عادل محمود
لا هيسهر ليل يكتب أشعار
و لا هيشيل همك ليل و نهار
و لا قلبه هيبقي البيت و الدار
هيدق فـ نعشك 100 مسمار
و مجرد نذوة و هتعدي
مش ممكن هيحبك قدي
إوعي يغرك لمسه إيده
و لا نظرة عينه و تنهيده
هيقولك حبك في وريده
هيقولك أحضانك عيده
هيقولك قلبك سيد سيده
و هيبعت أشواق في بريده
و هيرسم أحلامك وردي
مش ممكن هيحبك قدي
هيجبلك دبله و كام دبدوب
و هيرسم حرف فـ وسط قلوب
و هيحلفلك فـ هواكي بدوب
و إنتي القسمة و هو المكتوب
هيقولك يا سمايا و أرضي
مش ممكن هيحبك قدي
ما تصدقهوش دا كلام متعاد
من قبلك خد 100 ألف معاد
من رانيا و بوسي و مايا و نهاد
و إتجوز عنده بنات و ولاد
أساميهم و صورهم عندي
مش ممكن هيحبك قدي
جربي تغضبي مش هيصلحك
هيسيبك وسط ألم جرحك
و لا هيكون هو سبب فرحك ..
طب ليه بتكابري و بتعاندي ؟
مش ممكن هيحبك قدي
جايز يشغلك تفكيرك
و يبدل جنه عصافيرك
و هيبقي فـ حضن بنات غيرك
و أما يشد إنتي تهدي
مش ممكن هيحبك قدي
القصة قديمه و متعادة
و ممله و بايخة و بزيادة
هيسيبك يبعد كالعادة
هيجبلك سبحه و سجادة
و يقولك حبك دا عبادة
هيقولك يا صلاتي و فرضي
مش ممكن هيحبك قدي
و الله ما هيحبك قدي.
